Tramp avtomobil zavodlarında Patriot və Tomahawk raketlərinin istehsalına başlanacağını açıqlayıb

Amerikanın avtomobil konsernləri yaxın vaxtlarda hərbi məhsul istehsalına başlayacaqlar.

"PostMedia" xəbər verir ki, bu barədə ABŞ Prezidenti Donald Tramp "Ağ Ev"də jurnalistlərlə söhbəti zamanı bildirib.

“Onların zavodların yenidən profilləşdirilməsi ilə bağlı planları var. Biz silah və sursat istehsal edəcəyik, o cümlədən Patriot (zenit-raket kompleksləri), "Tomahawk" (qanadlı raketlər) və daha çoxunu”, — deyə o qeyd edib.

"Ağ Ev"in rəhbəri dəqiqləşdirib ki, ölkə hakimiyyəti müdafiə sənayesinin genişləndirilməsi üçün irimiqyaslı iqtisadi proqram başladıb. Boş istehsal güclərinə malik avtomobil istehsalçıları artıq raket texnikasının istehsalı ilə bağlı müqavilələr bağlayırlar.

“Onlar "General Motors" və "Ford" ilə əməkdaşlıq edirlər, amma mən bilirəm ki, xüsusilə "General Motors" silah istehsalında böyük maraq göstərir”, — deyə Tramp əlavə edib.